مُعَاف فضل وکرم سے ہو ہر خطا یارب     ہو مغفرت پئے سلطانِ انبیا یارَبّ

نبی کا صدقہ سَدا کے لئے تُو راضی ہو          کبھی بھی ہونا نہ ناراض یاخُدا یَارَبّ

صَلُّوْا عَلَی الْحَبیب!          صَلَّی اللّٰہُ عَلٰی مُحَمَّد

امامِ حُسَیْن  رَضِیَ اللّٰہ عَنْہُ  کا ذِکْرِ خیر

پیارے اسلامی بھائیو! 5 شَعْبَانُ الْمُعَظَّم کو امام عالی مقام، امامِ عرش مقام حضرت امام حُسَیْن  رَضِیَ اللّٰہ عَنْہُ  کا یومِ وِلادت ہے۔  آئیے! آخر میں اللہ پاک کی رِضا پانے اور ثواب کمانے کے لئے امام حسین  رَضِیَ اللّٰہ عَنْہُ  کا ذِکْرِ خیر کر لیتے ہیں۔

 اَہْلِ سُنّت کے دِل کا چین، سَیِّدُنا امام حسین  رَضِیَ اللّٰہ عَنْہُ  نبیوں کے تاجدار، مکی مدنی سرکار صَلَّی اللہُ عَلَیْہِ وَاٰلِہٖ وَسَلَّم کے نواسے، مولائے کائنات مولا علی  رَضِیَ اللّٰہ عَنْہُ  کے شہزادے، شہزادئ رسول، حضرت فاطمۃ الزہر رضی اللہ عنہا  کے جگر کے ٹکڑے اور امامِ حَسَن مجتبیٰ  رَضِیَ اللّٰہ عَنْہُ  کے چھوٹے بھائی ہیں، آپ  رَضِیَ اللّٰہ عَنْہُ  کی وِلادتِ باسَعَادت 5 شَعْبَانُ الْمُعَظَّم 4 سِنِ ہجری کو مدینۂ منورہ میں ہوئی۔^([1])

مرحبا! سَرْوَرِ عالَم کے پِسَر آئے ہیں                                                          سیدہ فاطمہ کے لختِ  جگر آئے ہیں

واہ قسمت! کہ چراغِ حرمین آئے ہیں                                                        اے مسلمانو! مبارک کہ حُسَیْن آئے ہیں^([2])

امام عالی مقام  رَضِیَ اللّٰہ عَنْہُ  کا مُبَارَک نام: حُسَیْن، کنیت: اَبُو عبد اللہ اور القاب: سِبْطِ رسول اللہ اور رَیْحَانَۃُ الرَّسُوْل (یعنی رسول کے پھول) ہے۔^([3])