Sadqa Khalis Karne Ka Tariqa

باتوں سے خوشبو آئے

حلال کمانے اور نیک کام میں خرچ کرنے کی جزا

دُنیا میٹھی اور سَرسَبز ہے،جس نے اس میں سے حَلال طَریقے سے کمایا اور اُسے ثواب کے کام میں خرچ کیا اللہ پاک اُسے ثواب عطا فرمائے گا اور اپنی جَنّت میں داخل فرمائے گا۔ (ارشادِ حضرت سَیِّدُنا عُمَر بن خَطَّاب رضی اللہ عنہ) (شعبُ الایمان،ج4،ص396،رقم:5527)

بلند مرتبے والوں پر آزمائشوں کی کثرت

اللہ پاک کے یہاں بندے کو جب کوئی مقام و مرتبہ حاصل ہوتا ہے تو اس پر آزمائشیں بڑھتی جاتی ہیں۔(ارشادِ حضرت سَیِّدُنا کعب اَحبار رحمۃ اللہ علیہ) (حلیۃ الاولیاء،ج5،ص401،رقم:7513)

صدقہ خالص کرنے کا طریقہ

جب تم کسی مِسکین کو کوئی چیز دو اور وہ تمہیں برکت کی دُعا دے تو تم بھی اسے برکت کی دُعا دو تاکہ تمہارا صدقہ خالِص ہوجائے۔(ارشادِ حضرت سَیِّدُنا عَون بن عبداللہ رحمۃ اللہعلیہ) (حلیۃ الاولیاء،ج4،ص282،رقم:5584)

طالبِ علم کو کیسا ہونا چاہئے؟

طالب علم کے لئے وقار، دلی سکون، خوفِ خدا اور اپنے بُزُرگوں کی پیروی ضروری ہے۔

(ارشادِ حضرت سیِّدُنامالک بن انسرحمۃ اللہ علیہ) (حلیۃ الاولیاء،ج6،ص354،رقم: 8901)

احمد رضا کا تازہ گلستاں ہے آج بھی

کھانا کھلانے کی فضیلت

شِیرِینی (مٹھائی) یا کھانا فُقراء (غریبوں) کو کھلائیں تو صَدَقہ ہے اور اَقارِب (رشتے داروں) کو (کھلائیں) تو صِلَۂ رِحْم (رشتے داروں کے ساتھ بھلائی) اور اَحباب (دوستوں) کو (کھلائیں) تو ضِیافت (دعوت)، اور یہ تینوں باتیں مُوجِبِ نُزُولِ رَحمت و دَفْعِ بلا و مصیبت (یعنی رحمت نازل ہونے اور مصیبت و پریشانی کے دور ہونے کا سبب) ہیں۔(فتاویٰ رضویہ،ج24،ص185)

ماں باپ انسان کی جنّت اور دوزخ ہیں

آدَمی ماں باپ کو راضی کرے تو وہ اِس کے جنّت ہیں اور ناراض کرے تو وہی اس کے دوزخ ہیں (یعنی والدین کو راضی کرنا جنّت جبکہ انہیں ناراض کرنا دوزخ میں جانے کا سبب بن سکتا ہے)۔(فتاویٰ رضویہ،ج24،ص384)

گناہ کرنے سے بڑا گناہ

مَعْصِیَت کی اجازت معصیت سے بڑھ کر معصیت ہے (یعنی گناہ کرنے کی اجازت دینا گناہ کرنے سے بڑا گناہ ہے )۔(فتاویٰ رضویہ،ج 24،ص174)

عطّار کا چمن، کتنا پیارا چمن!

مصیبت پر صَبْر کی ایک صورت

مصیبت پر صَبْر کرنے کی ایک صورت یہ ہے کہ کسی سے اس مصیبت کا بِلا مصلحت اظہار نہ کیا جائے۔(مَدَنی مذاکرہ،10محرم الحرام1436ھ)

دُرود شریف کی کثرت

جو دُرودِ پاک پڑھنے کی عادت بنالے تو اس کے لئے کثرت سے دُرود شریف پڑھنا آسان ہوجاتا ہے۔(مَدَنی مذاکرہ،9ربیع الاول1436ھ)

درسِ فیضانِ سنت کے فوائد

جو فیضانِ سنّت سے دَرْس دینے کی صلاحیت (Ability) رکھتا ہے اسے چاہئے کہ ضَرور درس دے کیونکہ درس دینے سے معلومات میں اضافہ، نیکی کی دعوت دینے کا ثواب، اپنی اور دوسروں کی اِصلاح کا سامان ہوتا ہے۔(مَدَنی مذاکرہ،6ربیع الاول 1436ھ)