اگرکسی کے پاس بہت ساری کتابیں ہوں اور وہ کتابیں اس کی حاجت ِ اصلیہ میں سے ہیں تو لے سکتا ہے اگرچہ لاکھوں کی ہوں اور اگر حاجت ِ اصلیہ میں سے نہیں ہیں تو بقدرِ نصابِ ہونے کی صورت میں نہیں لے سکتا ۔اس میں تفصیل یہ ہے کہ

٭ فقہ ، تفسیر اور حدیث کی کتابیں اہلِ علم(یعنی جسے پڑھنے ، پڑھانے یا تصحیح کے لئے ان کتابوں کی ضرورت ہو) کے لئے حاجت ِ اصلیہ میں سے ہیں اور دوسروں کے لئے حاجت ِ اصلیہ میں سے نہیں۔اگر ایک کتاب کے ایک سے زائد نسخے ہوں تو وہ اہل ِ علم کے لئے بھی حاجت ِ اصلیہ میں سے نہیں ہیں۔

          ٭ کفار اور بدمذہبوں کے رد اور اہل ِ سنت کی تائید میں لکھی گئیں اورفرض علوم پر مشتمل کتابیں ، عالم اور غیر عالم دونوں کی حاجت ِ اصلیہمیں سے ہیں۔

          ٭ عالم اگر بدمذہبوں کی کتابیں ان کے رد کے لئے رکھے تو یہ اس کی حاجت ِ اصلیہ میں سے ہیں۔غیرِ عالم کو تو ان کا دیکھنا ہی جائز نہیں۔

          ٭ قرآن ِ مجید غیرِ حافظ کے لئے حاجت ِ اصلیہ میں سے ہے حافظِ قرآن کے لئے نہیں۔(جبکہ اس کاحفظِ قرآن مضبو ط ہو )

          ٭ طب کی کتابیں طبیب کے لئے حاجت ِ اصلیہ میں سے ہیں جبکہ ان کو مطالعہ میں رکھے یا دیکھنے کی ضرورت پڑتی ہو ۔

(الدر المختاروردالمحتار، کتاب الزکوٰۃ، مطلب فی ثمن المبیع وفائً، ج۳، ص۲۱۷، بہارِ شریعت، ج۱حصہ ۵، ص۸۸۲)

غنی کا زکوٰۃ لینا

       حضورِ پاک، صاحبِ لَولاک، سیّاحِ افلاک صَلَّی اللہُ تَعَالٰی عَلَیْہِ وَاٰلِہٖ وَسَلَّمَ  نے فرمایا : ’’زکوٰۃ کسی مال میں نہ ملے گی مگر اسے ہلاک کردے گی ۔‘‘ امام احمد رَحْمَۃُ اللہِ تَعَالٰی عَلَیْہِنے اس حدیث کے معنی یہ کئے کہ مالدار شخص زکوٰۃ لے لے تو یہ اس کے (بقیہ)مال کو ہلاک کردے گی۔

(الترغیب والترھیب، کتاب الصدقات، باب الترھیب من منع الزکوٰۃ، الحدیث۱۸، ج۱، ۳۰۹)

            زکوٰۃ تو فقیروں کے لئے ہوتی ہے ، غنی کو زکوٰۃ لینا حرام ہے اور جہنم میں لے جانے والا کام ہے ۔ ایسے شخص کو اس مال ِ حرام کے سبب قبروحشر اور میزان کی پریشانیوں اور عذاباتِ جہنم کا سامناکرنا پڑے گا ۔(فتاویٰ رضویہ مُخَرَّجہ، ج۱۰، ص۲۶۱ ملخصًا)

جس کے پاس چھ تولے سونا ہو!

          جس کے پاس چھ تولے یا ساڑھے باون تولہ چاندی کی قیمت کے برابرسونا ہو اگرچہ اس پر زکوٰۃ فرض نہیں ہوتی کہ سونے کی نصاب ساڑھے سات تولے ہے مگر ایسا شخص زکوٰۃ لے نہیں سکتا ۔(ماخوذ از بہارِ شریعت ، ج۱، حصہ۵، مسئلہ ۲۷ص۹۲۹)

حاجتِ اصلیہ سے زائد سامان ہو تو؟

           جس کے پاس ضرورت کے سواایسا سامان ہے جو مال نامی نہ ہو اور نہ ہی تجارت کے لیے ، اور وہ ساڑھے باون تولہ چاندی کی قیمت کے برابر ہیتو اسے زکوٰۃ نہیں دے سکتے اگرچہ خُود اس پر زکوٰۃ واجب نہیں۔(ماخوذ از بہارِ شریعت ، ج۱، حصہ۵، مسئلہ ۲۷ص۹۲۹)

جس کے پاس بہت سا جہیز ہو!

          عورت کو ماں باپ کے یہاں سے جو جہیز ملتا ہے اس کی مالک عورت ہی ہے ، اس میں 2 طرح کی چیزیں ہوتی ہیں ایک : حاجت کی جیسے خانہ داری کے سامان، پہننے کے کپڑے ، استعمال کے برتن اس قسم کی چیزیں کتنی ہی قیمت کی ہوں ان کی وجہ سے عورت غنی نہیں ، دوسری :  وہ چیزیں جو حاجتِ اصلیہ سے زائد ہیں زینت کے لیے دی جاتی ہیں جیسے زیور اور حاجت کے علاوہ اسباب اور برتن اور آنے جانے کے بیش قیمت بھاری جوڑے ، ان چیزوں کی قیمت اگر بقدر نصاب ہے عورت غنی ہے زکوٰۃ نہیں لے سکتی۔ (ردالمحتار، کتاب الزکاۃ، باب المصرف، مطلب في جہاز المرأۃ ہل تصیر بہ غنیۃ، ج۳، ص۳۴۷)

جس کے پاس موتی جواہر ہوں !

          موتی وغیرہ جواہر جس کے پاس ہوں اور تجارت کے لیے نہ ہوں تو ان کی زکوٰۃ واجب نہیں ، مگر جب نصاب کی قیمت کے ہوں تو زکوٰۃ لے نہیں سکتا۔ (ماخوذ از بہارِ شریعت ، ج۱، حصہ۵، مسئلہ۳۷ص۹۳۰)