Book Name:Zoq-e-Naat

میری بے قراریوں کو نہ کبھی قرار آئے

 

مجھے نزع چین بخشے مجھے موت زندگی دے

وہ اگر میرے سرہانے دَمِ اِحتضار آئے

 

سبب وُفورِ رحمت مری بے زبانیاں ہیں

نہ فغاں کے ڈھنگ جانوں نہ مجھے پکار آئے

 

کھلیں پھول اُس پھبن کے کھلیں بخت ہر چمن کے

مِرے گل پہ صدقے ہو کر جو کبھی بہار آئے

 

نہ حبیب سے محب کا کہیں ایسا پیار دیکھا

وہ بنے خدا کا پیارا تمہیں جس پہ پیار آئے

 

مجھے کیا اَلم ہو غم کا مجھے کیا ہو غم اَلم کا

کہ علاج غم اَلم کا مرے غمگسار آئے

 

جو امیر و بادشاہ ہیں اسی دَر کے سب گدا ہیں

تمہیں شہریار آئے تمہیں تاجدار آئے

 

جو چمن بنائے بن کو جو جناں کرے چمن کو

مِرے باغ میں الٰہی کبھی وہ بہار آئے

 

یہ کریم ہیں وہ سرور کہ لکھا ہوا ہے دَر پر

جسے لینے ہوں دو عالم وہ امیدوار آئے

 

ترے صدقے جائے شاہا یہ ترا ذلیل منگتا

ترے دَر پہ بھیک لینے سبھی شہریار آئے

 

چمک اُٹھے خاکِ تیرہ بنے مہر ذَرَّہ ذَرَّہ

مِرے چاند کی سواری جو سر مزار آئے

 

نہ رُک اے ذلیل و رُسوا دَرِ شہریار پر آ

کہ یہ وہ نہیں ہیں حاشا جنہیں تجھ سے عار آئے

 

تری رحمتوں سے کم ہیں مرے جرم اِس سے زائد

نہ مجھے حساب آئے نہ مجھے شمار آئے

 

گل خلد لے کے زاہد تمہیں خارِ طیبہ دے دوں

مِرے پھول مجھ کو دیجے بڑے ہوشیار آئے

 



Total Pages: 158

Go To