٭ …٭ …٭ …٭ …٭ …٭

دُرُود شریف کی فضیلت

فرمانِ مصطفے ٰ صَلَّی اللہُ تَعَالٰی عَلَیْہِ وَاٰلِہٖ وَسَلَّم: جب تم رسولوں ( عَلَیْہِمُ السَّلَام ) پر دُرُودِ پاک پڑھو تو مجھ پر بھی پڑھو ،بے شک میں تمام جہانوں کے ربّ کا رسول ہوں ۔^{( [1] )}

صَلُّوْا عَلَی الْحَبِیْب!                       صَلَّی اللّٰہُ تَعَالٰی عَلٰی مُحَمَّد

( 23 )...رِیَا کاری

”رِیاکاری“ کی تَعْرِیف

اللہ پاک کی رِضا کے عِلاوہ کسی اور اِرادے سے عِبَادت کرنا رِیَاکَارِی ہے ۔^{( [2] )}  

”رِیاکاری“ کی چند مِثَالَیں

٭ عِلْمِ دین اس لئے حاصِل کرنا کہ اس کے ذریعے دنیا کا مال کمائے یا لوگوں میں اس کی واہ واہ ہو ۔ ٭ نماز اس لئے پڑھنا کہ لوگ اسے نیک نمازی سمجھیں ۔ ٭ حج اس لئے کرنا کہ لوگ اسے حاجی صاحِب کہہ کر پُکاریں ۔ ٭ سخی مشہور ہونے کے لئے صدقہ وخیرات کرنا وغیرہ ۔

”رِیاکاری“ کے مُتَعَلِّق مختلف اَحْکَام

( 1 ): ریاکاری حرام اور جہنّم میں لے جانے والا کام ہے ۔^{( [3] )} ( 2 ): رِیَا کی وجہ سے عِبَادت کا ثواب نہیں مِلتا بلکہ گُنَاہ ہوتا ہے اور یہ شَخْص ( یعنی رِیَاکاری کرنے والا ) مستحقِ عذاب ہوتا ہے ۔^{( [4] )} ( 3 ): رِیَا سے عِبَادت ناجائز نہیں ہو جاتی ( یعنی ایسا نہیں کہ رِیَاکاری سے نماز پڑھی تو اسے تَرْکِ نماز سمجھا جائے ) بلکہ نامقبول ہونے کا اندیشہ ہوتا ہے اگر رِیَاکار آخر میں رِیَا سے  ( سچی ) توبہ کرے تو اس پر رِیَا کی عِبَادت کی قضا واجِب نہیں بلکہ اس توبہ کی برکت سے گُزَشتہ نامقبول رِیَا کی عِبَادات بھی قبول ہو جائیں گی ۔^{( [5] )}

آیتِ مُبَارَکہ

فَمَنْ كَانَ یَرْجُوْا لِقَآءَ رَبِّهٖ فَلْیَعْمَلْ عَمَلًا صَالِحًا وَّ لَا یُشْرِكْ بِعِبَادَةِ رَبِّهٖۤ اَحَدًا۠( ۱۱۰ ) ( پ١٦، الكهف: ١١٠ )

ترجمۂ کنزالایمان: تو جسے اپنے ربّ سے ملنے کی امید ہو اُسے چاہئے کہ نیک کام کرے اور اپنے ربّ کی بندگی میں کسی کو شریک نہ کرے ۔

یعنی شِرکِ اَکْبَر سے بھی بچے اور رِیا سے بھی جس کو شِرکِ اَصْغَر کہتے ہیں ۔^{( [6] )}

فرمانِ مصطفٰے صَلَّی اللہُ تَعَالٰی عَلَیْہِ وَاٰلِہٖ وَسَلَّم

بے شک جہنّم میں ایک وادی ہے جس سے جہنّم روزانہ 400 مرتبہ پناہ مانگتا ہے ، یہ وادی اُمَّتِ مُحَمدِیَّہ کے اُن رِیاکاروں کے لئے تیّار کی گئی ہے جو قرآنِ پاک کے حافِظ، غیراللہ کے لئے صدقہ کرنے والے ، اللہ پاک کے گھر کے حاجی اور راہِ خُدا میں نکلنے والے ہوں گے ۔^{( [7] )}

رِیاکاری کے گُنَاہ میں مبتلا ہونے کے بَعْض اسباب

( 1 ): شُہْرت کی خواہش ۔ ( 2 ): مَذَمَّت ( یعنی لوگوں کے بُرا کہنے ) کا خوف ۔ ( 3 ): مال و دولت کی حِرْص ۔^{( [8] )}